Аҧсны Аҳәынҭқарра Раҧхьаӡатәи Ахада Владислав Григори-иҧа Арӡынба диижьҭеи 70-шықәса ҵит

Аҧсны  Аҳәынҭқарра Раҧхьаӡатәи Ахада Владислав Григори-иҧа Арӡынба диижьҭеи 70-шықәса ҵит

Лаҵара 14 рзы Аҧсны ахьынӡанаӡааӡо иазгәарҭеит  Аҧсны Раҧхьаӡатәи Ахада Владислав Григори-иҧа Арӡынба диижьҭеи 70 шықәса аҵра. Қалақьцыҧхьаӡа имҩаҧыргон Владислав Григори-иԥа игәалашәара иазкыз аусмҩаҧгатәқәа. 

Раҧхьаӡатәи Ахада диижьҭеи 70 шықәса аҵра аламҭалазы  АҞӘАФОН еиҿнакааит “Ҳара ҳаруаа реиҳабы» аконцертқәа иаразнакала  ҳреспублика ақалақьқәа ҩба рҿы.

Лаҵара 11 рзы Аҟәа, Р. Гәымба ихьӡ зху Аҧснытәи аҳәынҭқарратә филармониаҿы «АМА RECORDS» амузыкарҳәаҩцәа – Анри Гәымбеи, Алхаси  Алмасхани Марколиааи рмузыкатә нагӡаралеи, иара убас апроект “Ҳара ҳаруаа реиҳабы» алахәылацәа – Ҭемыр Агрба, Ерик Миқаа, Гьаргь Кәакәасқьыр, Валера Берзениа, Нарсоу Абыхәба рашәаҳәарала, ахәаҧшцәа идырҳан   Аҧсны аџьынџьтәылатә еибашьра иалиааз ашәақәа. Ари аконцерт иасасцәан Аҧсны Ахада Рауль Џьумка-иҧа Ҳаџьымба, Владислав Григори-иҧа иҧшәма ҧҳәыс Светлана Ирадион-иҧҳа Џьергьениа, ҳреспублика ақалақьқәа рҟнытә иааз Аҧсны аџьынџьтәылатә еибашьра аветеранцәа, “Аҧсны анацәа аҭынчреи асоциалтә иашареи рзы Реидгыла” ахаҭарнакцәа, иара убас ақалақьуааи ҳаҳҭнықалақь  асасцәеи.

Лаҵара 12 рзы “Ҳара ҳаруаа реиҳабы” дырбан ақалақь-фырхаҵа Тҟәарчал иқәынхо ауааҧсыра.

Лаҵара 14 рзы, Владислав Арӡынба диижьҭеи 70 шықәса аҵра амш аҽны Аҧснытәи аҳәынҭқарратә Ахьӡ-аҧша амузеи аҿы  имҩаҧысит аӡыргарақәа ҩба.

Иӡырган Владимир Занҭариа иеиқәиршәаз аизга “Раҧхьатәи Ахада изы ажәа”. Уи иагәылалеит В.Г. Арӡынба иҳәынҭқарратәии,  иуаажәларра-политикатәии, иҭцаарадырратә усзуреи рҿы ихадоу аетапқәа ирызку   адокументал-публицистикатә очерк “Актәи Ахада”, убас ҳаамҭазтәи  ихьыҧшым аҧсуа ҳәынҭқарра ашьақәыргылаҩ изы еицырдыруа ауаа рыхшыҩҵакқәеи ргәалашәарақәеи, егьырҭ адокументқәеи. Иара убас  ашәҟәы адаҟьақәа рҿы рҭыҧ ааныркылеит  Владислав Григори-иҧа изку  ҳаамҭазтәи аҧсуа поетцәа рырҿиамҭақәа.

Ҭемыр Қәычбериеи Емма Хәаџьааи ахәаҧшцәа ирыдыргалеит Владислав Арӡынба иҧсҭазааратә мҩа иазку адокументалтә фильм “Иалкаау”.

Лаҵара 12 инаркны 17 рҟынӡа Гагратәи араион Алаҳаӡы ақыҭан АҞӘАФОН иҟанаҵаз аспонсорра иабзоураны аветеранцәа рыбжьара имҩаҧысит Раҧхьаӡатәи Ахада В.Г. Арӡынба игәалашәара иазкыз ахраҿа агаразы  ашьапылампыласратә турнир. 

АҞӘАФОН иҟанаҵаз ацхыраарала имҩаҧган: Очамчыра ашҭа хадаҿи Очамчыратәи ашкол-интернат аҿи агәалашәаратә хәылҧазқәа, А.К.Чачба ихьӡ зху Аҟәатәи асахьаҭыхратә ҵараиурҭа астудентцәа русумҭақәа рцәыргақәҵа, И. Папасқьыр  ихьӡ зху Амилаҭтә библиотека еиҿнакааз  аусмҩаҧгатәқәа рцикл “Иара далнахит аамҭа”, Гәдоуҭа ақалақь аҿы В.Г. Арӡынба ихьӡ зху ашҭаҿы авокзал ахаҿратә ган аиҿкаара.

Иара убас Аҧсны  раҧхьатәи амобилтә оператор аусзуҩцәа рхахьы иргеит Владислав Арӡынба исахьа зну амакетқәа рырхиара. Амакетқәа аус рыдиулеит Аҧсни Урыстәылеи рсахьаҭыхыҩцәа Реидгылақәа рылахәыла, Д. Гәлиа  ихьӡ зху аҳәынҭқарратә премиа алауреат Баҭал Џьапуа. 87 баннер еихшаны иқәыргылан ҳреспублика араионқәа зегьы рҿы, АҞӘАФОН иатәу аҭыҧқәа рҿы.

Владислав Арӡынба зхаҭара уникалтәу уаҩуп. Уи Аҧсны аҭоурых аҿы наӡаӡа данылоит ҳаамҭазтәи аҧсуа ҳәынҭқарра дашьаҭаркыҩны. Уажәшьҭа акрааҵуеит аиааира згаз уи афырхаҵа ихьӡ лаша еицырдыруа иҟалеижьҭеи.

Абиҧарақәа ишахәҭоу еиҧш ҳаҭыр ақәырҵоит  ари аҳәынҭқарратә усзуҩы ду илиршаз зегьы. Ажәлар рхы-ргәаҿы В.Г. Арӡынба наӡаӡа даанхоит ҳреспублика ахақәиҭреи ахьыҧшымреи азаазгаз  зегь реиҳа илашоу  Аҧсны аҧхьагылаҩны.

 

«АКӘАФОН-GSM»  адәныҟатәи аимадарақәа рыҟәша