Первый мобильный оператор Абхазии
23-04-2015
АҞӘАФОН – апроект “Аиааира ахаҿқәа” аинформациатә спонсорс иҟоуп
АҞӘАФОН – апроект “Аиааира ахаҿқәа” аинформациатә спонсорс иҟоуп
Аџьынџьтәылатә еибашьра Дуӡӡаҿы Аиааира 70 шықәса аҵра инақәыршәаны иаҧҵоу апроект “Аиааира ахаҿқәа” аҩбатәи аетап хацыркын мшаҧы 23 рзы.
Ари апроект аҧҵан Аинформациатә агентра Sputnik-Аҧсни адипломатцәа ҿарацәа Реидгылеи Ареспублика Аҧсны Ахада иусбарҭеи Аҧсны адәныҟатәи аусқәеи рыцхыраарала. Аинформациатә спонсорс иҟоуп – аилахәыра АҞӘАФОН.
Мшаҧы 23 рзы асасааирҭа “Атриум Викториа” аконференц-зал аҿы имҩаҧысит апроект “Аиааира ахаҿқәа” аҩбатәи аетап иадҳәалоу аусмҩаҧгатәқәа ирызкыз апресс-конференциа. Аконференциа рхы аладырхәит Sputnik-Аҧсны амультимедиатә хаб анапхгаҩы Инал Лазба, «АҞӘАФОН-GSM» аӡыргареи адәныҟатәи аимадарақәеи рыҟәша аиҳабы Гета Арӡынба, адипломатцәа ҿарацәа Реидгыла ахантәаҩы Амина Лазба, Аҧсны Ахада иексперттә напхгара аиҳабы Иракли Хынҭәба.
Апроект аҩбатәи аетап аҿы ихадоу хәҭаны иҟалоит Аҧсны ақалақьқәеи араионқәеи рҿы Аџьынџьтәылатә еибашьра Дуӡӡа аветеранцәа рфотосахьақәа зну абаннерқәа рықәыргылара.
Дизаинертә знеишьала баннерцыԥхьаӡа иазыӡбоуп аветеранцәа рпатреҭқәа ҩба. Акы – аибашьра аамҭазтәи, егьи – аветеран ҳаамҭазтәи ифотосахьа. Аветеранцәа рфотосахьақәа зну абаннерқәа ықәыргылахоит Аџьынџьтәылатә еибашьра Дуӡӡа иалахәыз дарбанзаалак аветеран дахьынхо араионқәа рҿы.
Ари апроект алыршаразы апроект ахаҧшьгаҩцәа АҞӘАФОН ирынаҭеит ҳтәыла зегьы аҿы 86 информациатә қәыҧшылара, иара убасгьы апроект амедиа-цхыраара азыҟанаҵеит.
“Аиааира ахаҿқәа” – Аџьынџьтәылатә еибашьра Дуӡӡа иазкны аҵыхәтәантәи аамҭазы иҟаҵоу зегь реиҳа зымҽхак ҭбаау проектуп. Апроект иафырхацәахеит Аҧсны иқәынхо 80-ҩык аветеранцәа.
Уи аиҿкаара аан Аинформациатә агентра Sputnik-Аҧсны аусзуҩцәа аус ду мҩаҧыргеит: урҭ аӡәаӡәала ирҭааит аветеранцәа зегьы, афырхацәа хаҭала ирыҿцәажәаны рҭоурыхқәа еизганы ианырҵеит.
Апроект “Аиааира ахаҿқәа” – Аџьынџьтәылатә еибашьра Дуӡӡа афырхацәа иаабартә, иҳаҳартә, урҭ рыҧсҭазаара аҭоурых иазаанхартә еиҧш алшара ҳнаҭоит.
«АҞӘАФОН-GSM» адәныҟатәи аимадарақәа рыҟәша