Аҧсны акультуреи аҭоурых-культуратә ҭынха ахьчареи рминистрреи Фазиль Искандер ихьӡ зху Жәларбжьаратәи акультуратә фонд “Ауаҩы игыларҭеи” имҩаҧыргеит Фазиль Искандер ихьӡ зху 3-тәи Жәларбжьаратәи акультура афестиваль “Ауаҩы игыларҭа”.

Аҧсны акультуреи аҭоурых-культуратә ҭынха ахьчареи рминистрреи Фазиль Искандер ихьӡ зху Жәларбжьаратәи акультуратә фонд “Ауаҩы игыларҭеи” имҩаҧыргеит Фазиль Искандер ихьӡ зху 3-тәи Жәларбжьаратәи акультура афестиваль “Ауаҩы игыларҭа”. 

АҞӘАФОН аусзуҩцәа рзы Фазиль Абдул-иҧа Искандер идҳәалоу атема еснагь аинтерес аҵоуп, ирзааигәоуп. Уи ииашан дуаҩ ҟәыш дуун, ирҿиара ухнахуеит иаарҧшу аҵаулареи аҧсҭазаареи ауаатәыҩса реизыҟазаашьеи аганахьала имоу даҽакы иаламҩашьо идунеихәаҧшышьеи рыла.

2014 шықәсазы  адунеи абеит Фазиль Искандер иразҟи ибиографиеи, Аҧсни иареи шьала-далеи, уаҩытәыҩсалеи, алитература алеи ирыбжьаз  аимадара аазырҧшуаз, “Аҟазаашьа асиужет” ҳәа хьӡыс измаз, Ибрагим Ҷкадуа иаҧиҵаз адокументалтә  фильм. Уи афильм аҧҵара алыршахеит АҞӘАФОН иҟанаҵаз афинанстә цхыраара абзоурала.

2016 шықәса, нанҳәа мзазы  аҿартә политиказы Аҧснытәи Аҳәынҭқарратә комитети АҞӘАФОН-и еицымҩаҧыргеит Фазиль Абдул-иҧа игәалашәара иазкыз  Акциа “Ҳара ҳ-Фазиль”. Аҧсны жәлар зегьы рзы Фазиль Искандер иҟамзаара – харҭәаашьа змам цәыӡ дууп.

Сынтәагьы ҳара иацаҳҵоит иаҳзааигәоу атема, ҳадгылоит Аҧсны абҵара 20 инаркны 22 рҟынӡа имҩаҧысуа Фазиль Искандер ихьӡ зху 3-тәи Жәларбжьаратәи акультура афестиваль “Ауаҩы игыларҭа”.

Афестиваль иахҵоуп ҳаамҭазтәи ашәҟәыҩҩы ду, аурыс литература аклассик, Аҧсны азышәаҳәаҩ Фазиль Искандер иажәабжьқәа руак ахьӡ. Ари ажәа азҟаза ду ирҿиара инарҭбааны ирдыруеит, уи адунеи  акультуратә ҭынха иахәҭакуп.

Жәларбжьаратәи афестиваль “Ауаҩы игыларҭа” хықәкыс иамоуп Аҧсни, Урыстәылеи, егьырҭ атәылақәеи рыбжьара культуратә цҳаны аҟалара.

Афестиваль кураторцәас иамоуп: Алықьса Шервашиӡе-Чачбеи  Шьазина Агрбеи.

Ахҧатәи афестиваль аҿы хҭыс хаданы иҟалеит Фазиль Искандер иповест иалхны иҭыху  асахьаркыратә фильм “Софичка” апремиера Аҧсуа телехәаҧшрала аефир аҿы ахәаҧшцәа дырбара .

Афильм арежиссиор – акультура аганахьала  ҳаҭыр ду змоу аҧхьахәқәеи аҳамҭақәеи занаршьахьоу, еицырдыруа аурыс кинорежиссиор, асценарист Александр Сокуров иҟазарҭа аушьҭымҭа – Кира Коваленко.

Ари акиносахьаҿы иаарҧшуп аҧсуа шьха қыҭаҿы инхо ауаа рразҟы. Ахәаҧшцәа рҿаҧхьа имҩаҧысуеит  ХХ-тәи ашәышықәса иаҵанакуа    аамҭа ҟәша дук -  афырхацәа рҭоурыхқәа аарҧшуп 40-тәи ашықәсқәа инадыркны, Аџьынџьтәылатә еибашьра Дуи, анаҩсан Хрушьиов ихаантәи “аҧсасиратә” аамҭеи налаҵаны, 70-тәи ашықәсқәа рҟынӡа. 

 Афильм аҭыхрақәа Аҧсны имҩаҧысуан. Уи аҿы  ароль хадақәа нарыгӡеит Аҧсны инхо арҧарцәеи аҭыҧҳацәеи. Ипрофессионалтәу актиорцәа ари афильм аҿы зықәрахь инеихьоу аперсонажцәа рхаҿсахьақәа роуп инарыгӡо. Афильм аҧсышәала иҭыхуп, асубтитрқәа аҵаҵаны ирышьҭуеит.

 Афестиваль аартра амш азы Фазиль Искандер ихьӡ зху  Аҳәынҭқарратә аурыс драматә театр асценаҿы имҩаҧысуеит Фазиль Искандер иповест “Софичка” иалхны иқәыргылоу аспектакль апремиера. Уи нарыгӡоит Борис Шьукин ихьӡ зху Москватәи Атеатртә институт аҧсуа студиа 3-тәи актиортә курс астудентцәа.   

Раҧхьаӡа акәны ари афестиваль рҽаладырхәуеит ахәыҷқәа. Уи аҳәаақәа ирҭагӡаны,  Аҟәатәи Ақәыҧшцәа Рыҩни Аҧсны  акультура аминистрреи еицымҩаҧыргоит акымкәа-ҩбамкәа акультуратә усхкқәа:

   Фазиль Искандер иажәабжьқәа рмотивқәа рыла идырбахоит асахьаркыратә фильм “Насыҧ зцу аҧшаахрақәа раамҭа”. Арежиссиор – Генрих Габаи.

     Фазиль Искандер ирҿиамҭақәа рҟнытә еиуеиҧшым асиужетқәа  рышьаҭала имҩаҧгахоит ахәыҷқәа рҭыхымҭақәа рконкурс.  Искандер ифырхаҵа хәыҷы Чик имҩахәасҭақәа рыла Фазиль Искандер и-Мухус аҩныҵҟа имҩаҧгахоит “Ахсаала Аҟәа Чик” зыхьӡу алитературатә ныҟәара.

 3-тәи Жәларбжьаратәи акультуратә фестиваль “Ауаҩы игыларҭа” хыркәшахоит Фазиль Искандер ихьӡ зху Аҳәынҭқарратә аурыс драматә театр аҿы, хәылбыҽхан, актиорцәа алархәны еиҿкаау “Чик изку ажәабжьқәа” зыхьӡу ҳарҿиаҩы ду ишәҟәы аҟнытә ацыҧҵәахақәа рыҧхьарала.

Уажәшьҭа хышықәсоуп Фазиль Искандер ихьӡ зху 3-тәи Жәларбжьаратәи акультуратә фестиваль “Ауаҩы игыларҭа” мҩаҧысуеижьҭеи  Ареспублика Аҧсны Ахада Рауль Ҳаџьымба ицхыраарала.

Афестиваль аинформациатә спонсорс иҟоуп Ахеилак АҞӘАФОН

Фазиль Искандер ихьӡ зху 3-тәи Жәларбжьаратәи акультуратә фестиваль “Ауаҩы игыларҭа”апрограмма:

                                                          Рашәара  20

 Фазиль Искандер ихьӡ зху 3-тәи Жәларбжьаратәи акультуратә фестиваль “Ауаҩы игыларҭа” аартреи  Фазиль Искандер иповест “Софичка” иалхны Борис Шьчукин ихьӡ зху Москатәи Атеатртә институт аҧсуа студиа 3-тәи актиортә курс астудентцәа рынагӡарала иқәыргылоу аспектакль апремиереи.

Арежиссиор, аинсценировка автор – Елена Одинцова .

Иахьымҩаҧысуа аҭыҧ: Фазиль Искандер ихьӡ зху Аҳәынҭқарратә аурыс драматә театр.

Иалагоит асааҭ 19.00 рзы.

                                              Рашәара 21

Фазиль Искандер иажәабжьқәа рмотивқәа рыла иҭыху асахьаркыратә фильм   “Насыҧ зцу аҧшаахрақәа раамҭа”дырбара. Арежиссиор – Генрих Габаи.

Иахьымҩаҧгахо аҭыҧ:  Аҟәатәи Ақәыҧшцәа Рыҩны.

Иалагоит асааҭ  11.00 рзы.

Фазиль Искандер иповест иалхны иҭыху  асахьаркыратә фильм “Софичка” апремиера Аҧсуа телехәаҧшра аефир аҿы апремиера дырбареи иаарту ахцәажәара  амҩаҧгареи.

Арежиссиор Кира Коваленко – Александр Сокуров иҟазарҭа аушьҭымҭа.

Иалагоит асааҭ 21.00 рзы.

                                            Рашәара 22

Фазиль Искандер ирҿиамҭақәа рҟнытә еиуеиҧшым асиужетқәа  рышьаҭала ахәыҷқәа рҭыхымҭақәа рконкурс амҩаҧгара.

Иахьымҩаҧысуа аҭыҧ: Аҟәатәи Ақәыҧшцәа Рыҩны

Иалагоит асааҭ 11:00 рзы.

Алитературатә ныҟәара “Ахсаала Аҟәа Чик” Мухус амҩаҧгара. Аныҟәара хацыркхоит Чик Иҩны аҿынтәи, анаҩс Чик изку ажәабжьқәа рҿы зыӡбахә ану аҭыҧқәа рыла.

Иалагоит асааҭ 17:00 рзы.

Алитературатә ҧхьарақәа. “Чик изку ажәабжьқәа” зыхьӡу ҳарҿиаҩы ду ишәҟәы аҟнытә ацыҧҵәахақәа рыҧхьара, актиорцәа рынагӡарала

Иахьымҩаҧысуа аҭыҧ: Фазиль Искандер ихьӡ зху Аҳәынҭқарратә аурыс драматә театр.

Иалагоит асааҭ 19.00 рзы.

Аҧсны акультуреи аҭоурых-культуратә ҭынха ахьчареи рминистрра